出post煽人去死　羅冠聰被網民圍插

「走佬」英國尋求政治庇護嘅前「香港眾志」主席羅冠聰，日前又來搞搞震喺fb發文，稱「抗爭期間，香港浮屍湧現」，並以緬甸亂局中多人傷亡一事問「手足」「你會願意為香港而死嗎」，搞到好多網民都圍攻佢，因為事實上佢先係最縮骨嘅一個，明顯「叫人衝，自己鬆」，面皮簡直比三尺更厚。

fb page「香港怎麼辦」就P圖譏諷羅冠聰，話「『阿聰』問『阿衝』會唔會願意為香港而死？咁阿聰自己呢？」 連網民「Kathy To」揶揄：「『走佬』嘅人問留低嘅人願唔願意去替死？如果你願意，預祝你一路好走。」「Caro Wong」質疑：「自己着草逃避，仲好意思叫人死？」「Chung Keung Tsui」睇穿：「佢不過用人命眾籌來抬高自己，命係你哋嘅，死多啲我有多些政治本錢。」